Deadline sa business permit gilugwayan



Bise Mayor Raymond Alvin Garcia (Gikan sa iyang Facebook page)

Gihatagan og lugway sa Cebu City Government ang ang libuan ka business owners sa pag-renew sa ilang mga business permit nga walay penalty o surcharge hangtod sa Enero 31, 2023.

Si City Treasurer Mare Vae “Ivy” Reyes sa interbyu sa Superbalita Cebu sa Enero 20, nagkanayon nga inay sa Enero 20 ang deadline sa renewal, ila kining gilugwayan hangtod sa katapusan sa buwan.

Kadtong mga mauwahi mapahamtangan unta og 2 porsiyento nga penalty ug 25 porsiyento nga surcharge kon wa pay extension.

Ang City Council nga gipangulohan ni Bise Mayor Raymond Alvin Garcia nipasar og resolution alang sa legal nga paghatag og lugway sa katawhan pag-renew sa ilang business permit.

“We have extended our deadline for the business permit renewal which is supposedly today but it is extended until January 31 through resolution number 16-1502-2023 already signed by Vice-Mayor Garcia but still for signature of Mayor Rama,” pahibawo ni Reyes.

Ang pangulo sa City Treasurer’s Office (CTO) nagkanayon nga ila nang gipatuman ang resolution bisan kon wala pa mapirmahi ni Rama sanglit sila nahibawo siya nga kanunay nagsuporta ang mayor sa panginahanglan sa business sector.

Matud pa ni Fernandez nga sa katapusang semana sa renewal sa business permit nagdasok na ang magpa-renew.

Ilang panawagan mao ang paghatag kanila og lugway nga kanunay usab gihimo sa City Government aron maatiman ang mga business owner ug book keepers.

NALANGAN

Giangkon ni Reyes nga adunay pagkalangan sa business tax assessment labi na kon dili magkasinabot ang business owner ug tax collector base sa mga dokumento nga gipresentar sa tag-iya sa business establishment.

Gipasabot sa City Treasurer nga ang rekisito pag-renew sa business permit naa sa luyo sa application form nga nangayo sa financial statement ug ubang forms gikan sa Bureau of Internal Revenue (BIR), Value Added Tax (VAT) returns apan kon wala, adto sila magbase sa gross sales sa miaging tuig.

“ Ang allegation during the pandemic, mao lang kuno gihapon ang sales nga gibutang. Let’s remember during the pandemic, naa sad toy business sector nga kusog labi na kadtong tambal, foods, even kadtong mga personal computer, laptop kay online naman to tanan. Ni consider gyud ta ato. In fact makita sa reports, ni lower gyud ang atong income, dili gyud siya ingon nga nipugos mi unsay atong gusto,” pagpasabot ni Fernandez.

Gihimo sab nga sanglitanan sa labing taas nga opisyal sa CTO nga adunay mga business establishment nga dili moisyu og resibo ngadto sa mga kustomer nga namalit sa ilang gibaligya sa tumong nga makadaginot sila inig bayad sa buhis.

Apan iyang gipaneguro nga dili kini makalusot inig abot sa ilang tax assessment.

Aduna say mga kompaniya sulod sa dagkong malls nga iyang gitug-an nga nideklarar lang og P300,000 sa ilang gross sales sa ilang baligya sama sa personal computer ug uban pa butang nga wala tuohi sa tax collector.

“I don’t think sakto na nga allegation (nga kami nagbuot). Although kono moingon sila nga ni-insist gyud ang maong personnel, that’s why naa mi especial concern nga lane para adto sila mo-present aron ma-settle mao nang malangan,” ni Fernandez.

“ If dili gyud magkasinabot, we will go with the declaration, but i-subject namo sa examination afterwards. Kon mo-examine ta, mao sab ni ang di nila ganahan kay kon mo-examine mi mo -three years mi, libro sa 22, 21 ug 20 so tan-awon namo. Usually 80-90% motaas pa hinuon,” dugang sa City Treasurer.

Gitug-an niya nga nakakolekta na og P490.4 milyunes ang CTO gikan niadtong Enero 5 hangtod Enero 19 gikan sa ilang renewal centers sa SM City Cebu ug Robinsons Galleria de Cebu.

Sa Enero 31, gipanglantawan ni Reyes nga moabot na sa P1 bilyon ang makolekta sa Dakbayan gikan sa dul-an 40,000 ka mga business establishment.





Source link

We will be happy to hear your thoughts

Leave a reply

Newsline.world
Logo